طفلة هولندية من أصل مصري تحتج على تعذيب وقتل الخنازير

طفلة هولندية من أصل مصري تحتج على تعذيب وقتل الخنازير Appl

طفلة هولندية من أصل مصري تحتج على تعذيب وقتل الخنازير

الاثنين, 18 مايو 2009

طبعا هذا الشبل من ذاك الأسد
ربنا يحميك ياكريستين

كريستين صموئيل بولس عبد المسيح

انا اسمي كريسيتين صموئيل،عندي 13 سنة،مولودة في هولندا.
أنا مسيحية قبطية،وبحب المسيح،والكنيسة.وبحب هولندا علشان هي بلدي اللي
اتولدت فيها وعايشة فيها. وبحب مصر علشان هي بلد بابا وماما،وبحب كل الناس
بكل اديانهم،وكل أشكالهم وألوانهم.
أنا مش بابص على الناس من بره،انا بص على قلوبهم اللي جوه.. ربنا خلق كل الناس زي بعض.
ودي أول مرة اشارك فيها في موقع قبطي،وسبب مشاركتي هي تعذيب وقتل الخنازير
بالقسوة دي كلها،وعلى فكرة،أنا بحب الحيوانات كتير،وأدرس علشان اكون
دكتورة حيوانات، وبأخذ أعلى الدرجات في المدرسة عن أي موضوع يتعلق
بالحيوان.

عاوزه أقول إن في ناس مسلمين متعصبين في مصر بيفكروا ان الخنزير دا مقدس عندنا!
وإن الانجيل بيطالبنا بتقديسه.
لكن دا مش صحيح،بس هما بيفكروا انه صحيح،وعلشان كدا بيذبحوا الخنازير بحجة المرض الخطير .
الخنازير مالوهموش ذنب علشان يذبحوهم بالطريقة البشعة دي ..
وكمان اصلا الخنزير بياخذ المرض من الانسان، مش الانسان اللي بياخده من الخنزير.
والمرض بدأ في مكسيكو،والعرب هما اللي سموها انفلونزا الخنازير.

بابا وماما شافوا فيلم فيديو صعب قوي وهم بيعذبوا ويموتوا الخنازير،وانا
مقدرتش اشوف الفيلم معاهم علشان لا اتحمل اشوف أي حيوان بيتعذب ويتقتل.
ماما قالت لي انهم أخذوا خنزيرة قربت تولد،وفتحو بطنها،وطلعوا العيال
بتاعها،وكمان فتحوا بطن العيال الصغيرين ورموها في مكنة كبيرة بتقطع وتفرم
الخنازير وهي صاحية. والخنازير كانوا بيصرخوا وهما بيتقطعوا.
دي قسوة بشعة،دا ظلم،دا حرام،يعنى الخنزير يرموه في المكنة وتقطع حتة من
جسمه وهو لسه عايش ويصرخ ويتألم ..أنا لما سمعت الكلام دا كنت هارجع
(اتقيأ).
وانا مستعدة أراهن بكل الكتب اللي في مكتبتي لو حد فيكم شاف فيلم رعب فيه
حاجات بالبشاعة دي. انا بحب الحيوان كتير،وبتابع برامج عالم الحيوان على
التليفزيون( Animal Planet ) . أنا شفت مرات كتيرة اسد بيهجم على غزالة ..
بس عمري ما شفت أسد بيأكل أي حيوان لسه عايش.
الاسد لما يجي يهجم على حيوان بيغرس انيابه في القصبة الهوائية علشان
الحيوان ما يعرفش يتنفس ويموت بسرعة من غير ما يتوجع،وبعد ما الحيوان يموت
يقوم الاسد بأكله،وبكدا الحيوان مش بيحس بأي ألم،لانه بيكون مات خلاص. لكن
في مصر كانوا بيعذبوا الخنازير وهم لسه صاحيين.
الاسد بيأكل الاول لغاية ما يشبع،وبعدين تيجي مراته وعياله علشان يأكلوا.
في نوع من الناس ممكن يعملوا كدا،يعني الرجالة تاكل الاول ، وبعدين يسيبوا الباقي للستات والعيال، ويمكن يأكلوا وما يفكروش فيهم!!!
أنا مولودة هنا في هولندا،ولما بازور مصر،باشوف بعيني ازاي بيضربوا
الحمير والكلاب،وبشوف فرق كبير خالص بين هولندا وبين مصر في التعامل مع
الحيوان.
انا مش باقول كدا على علشان بكره المسلمين.
انا بس باقول اللي بشوفه هنا في هولندا انهم بيحترموا الحيوان وبيحافظوا عليه وبيتعاملوا معاه بحب ورحمة .
في هولندا كل الناس زي بعض،مسيحي مسلم يهودي هندوسي،أسود ابيض أصفر بني،كلهم زي بعض.
ومحدش بيشتم التاني أو يموت التاني علشان دينه أو لون وشه.
وفي حماية كبيرة للاطفال في هولندا، ومعروف إن أطفال هولندا اسعد اطفال في العالم.
لكن أنا مش سعيدة!!
أنا حزينة وزعلانة على اللي بيحصل للاطفال في مصر.
وقلبي بيوجعني على الاطفال المعاقين والفقرا.
واللي عاوزين يخلوهم يسيبوا المسيح بالعافية.
من حق الولد والبنت يختاروا.
هنا في هولندا مفيش حاجات من دي خالص.
كان نفسي مصر تكون زي هولندا،علشان أنا بحب مصر كتير خالص .
نفسي الناس في مصر تعرف ان قتل الحيوانات حاجة مش كويسة.
وربنا خلق العالم بتوازن والعالم من غير الحيوانات هايخرب ويبوظ ،مثلا
الاسد بياكل الغزالة، والغزالة بتاكل النبات، ولما الاسد يموت يخلي الارض
تطلع زرع ونبات،ودا اسمه توازن في البيئة !!!
والخنازير في مصر بتاكل الزبالة،و لما ها يفضلو يموتوا فيهم ها تبقى مصر كلها زبالة،ودا ها يخرب البيئة .
وبعدين انا عازو اقول ان الطريقة البشعة اللي عملوها مع الخنازير،عملوها
قبل كدا في الناس المسيحيين .. علشان قلوبهم قاسية مفيهاش رحمة.
مصر فيها ظلم كتير، يعني مثلا واحدة ست شغالة في البيوت،هي عملت
الاكل،وبعدين هي تلم من وراهم،وبعد كل دا،هي تاكل لوحدها في المطبخ من
اللي فضل عنهم.
لو كان عندنا شغالة في البيت بتاعنا،كنت خلتها تاكل معانا،ولو عندي وقت اساعدها في التنظيف الطبيخ.
علشان احنا كلنا واحد في العالم كله،حتى لو انت اسود او ابيض،فقير ولا غني،وهو دا اللي بيعلموه لينا في المدرسة في هولندا.
لكن في مصر والعرب بيعلموهم حاجات تانية.
قلبي بيتقطع على المعوقين عقلياً في مصر،لما بيمشوا في الشارع ممكن العيال تضربهم بالطوب ويقولوا العبيط أهو.. وليه دا كله؟
علشان ابوهم وامهم مش بيعلموهم يحترموا الناس.
لكن احنا الاطفال المسيحيين اتعلمنا من الانجيل،ومن مدارس الاحد،ومن قدس
أبونا،ومن بابا وماما، نحترم كل الناس،وما نحتقرش حد،ونحترم حياة الإنسان
والحيوان،ونحافظ على الطبيعة اللي خلقها ربنا ومن غير الحفاظ على الطبيعة
ما نقدرش نتنفس،علشان ربنا خلق العالم حلو،بس الانسان هو اللي خربه بالحرب
والكذب والحاجات الوحشة اللي بتحصل في اوربا وامريكا،والسرقة،والقتل،واللي
بيخربوا في الطبيعة.

* انا معرفش اكتب عربي،لكن باتكلم عربي مصري كويس خالص،ودرست تاريخ مصر
باللغة الهولندية،وعملت موضوعات عن تاريخ مصر القديم،وعملت موضوع عن سيدنا
البابا شنودة،وأخذت الدرجات النهائية فيه، يعني فاهمة كويس اللي بيحصل،
وكمان بابا بيحكي لي كل حاجة، واتابع الأخبار العالمية في المدرسة مرة كل
اسيوع ، لكن معرفش اكتب كل اللي اعرفه بالعربي..
علشان كدا أنا قعدت جنب بابا ، وكنت بتكلم وهو يكتب اللي بقوله،ولم يساعدني،وقلت كل كلمة هنا من مخي ..
وما تستغربوش من الكلام اللي انا قلته دا،علشان أنا بنت صموئيل! ولازم اكتب زيه!! انا اخذت منه طريقة الكتابة!!
وفي المدرسة لازم كل شهر نكتب موضوع جديد من عشر صفحات،ومدرستي بتستغرب
مني بسبب قراياتي الكثيرة وبسبب كتابتي موضوعات التعبير،وقد حصلت على
الدرجات النهائية في مادة الثقافة في الشهادة الابتدائية.
وأنا باقرأ وأكتب الموضوعات الحرة باللغة الهولندية،ومشتركة في المكتبة
العامة،واحب أقرا القصص اللي بتتكلم عن الخير والمحبة والسلام،وكل الكتب
العلمية اللي بتتكلم عن الحيوانات، فانا مهتمة جداً بعلم الحيوان،ولما
هأكبر هأكون دكتورة حيوانات،علشان كدا اللي حصل للخنازير في مصر ضايقني
قوي ووجع قلبي . لكن اللي بيوجع قلبي اكتر،هو البنات المعوقات اللي في
مصر. وأنا لما بانزل اجازة باقضي الاجازة معاهم،والعب معاهم، وألبسهم
واسرح شعرهم، ومش بروح اتفسح.
وأنا عاوزه المواقع القبطية تخصص مكان للاطفال يكتبوا فيها بحريتهم كل اللي عاوزين يقولوه، وشكراً ليكم كلكم.

[/center]

تعقيب
الخادم المكرس لكلمة الله

صموئيل بولس عبد المسيح

على أول مقال لطفلته

خالص الشكر والتقدير لموقع الاقباط الاحرار على هذه اللفتة الانسانية
النادرة.. فهي المرة الأولى التي ينشر فيها موقع قبطي مقالاً لطفلة .
ولعل
هذا يكون مدعاة لتفكير المواقع القبطية في تخصيص مساحة لأطفالنا الأقباط
الذين ولدوا في المهجر ليعبروا من خلالها عن ردود أفعالهم تجاه ما يتعرض
له الأقباط في مصر،لربطهم بالقضية القبطية،ولتشجيع روح الانتماء لديهم.
إن
واجبنا الديني الروحي والأخلاقي والوطني يحتمون علينا أن نحكي لأطفالنا
تاريخ آبائنا،ولماذا تركنا وطننا،ولماذا بقينا مرتبطون به ارتباط الفروع
بالجذور.
لأن هؤلاء الأطفال هم رجال ونساء الغد الذين سيواصلون
القيام بدورنا،وسوف يسلموه لأطفالهم من بعدهم، وهكذا جيل يسلم جيل، لتبقى
قضيتنا القبطية حية في قلوب وضمائر الأجيال.

على المستوى
الإنساني، فلا أستطيع أن اصف لكم مشاعري كأب يقرأ أول مقال لأبنته ويحمل
نفس فكره المنشغل بقضية شعبه .. شعور بالفخر والإعجاب المصحوب بدموع الشكر
والعرفان للرب يسوع المسيح لمباركته لهذه الطفلة حتى إنها كانت تبشر باسمه
وسط الهولنديين الكبار بجراءة عجيبة وهي لم تزل في السادسة من عمرها!!

ورغم
صغر سنها إلا إنها عندما تزور مصر تصر على البقاء مع البنات المعاقات
الصغيرات لخدمتهن واللعب معهن وترفض الذهاب إلى أماكن الترفيه، ولذلك
فالمعاقات يحبونها وكذلك الراهبات ورئيس الخدمة .. علماً بأن طفلتي شديدة
الاعتزاز بمسيحها وكنيستها، وتحب المسلمين وتصلي من أجلهم .
ولقد
فوجئت بها أول أمس تنزل الى مكتبي وتجلس بجواري وتقول لي من فضلك يا بابا
انا عاوزه ارد على اللي بيعذبوا ويقتلوا الخنازير في مصر!!
وصممت على مطلبها بطريقة عجيبة.
وعلى قدر اعجابي بإيجابيتها وتفاعلها بما يحدث في وطن ابائها،على قدر
شعوري بالحرج والارتباك أمامها، لعلمي إن المواقع القبطية لا تنشر
للأطفال، ولعلمي بخطورة رفض مطلبها حتى لا تعثر وتحبط بينما المفروض في
كأب قبطي أن اشجعها.
فاستمعت لكل كلمة نطقت بها وكتبتها كما هي
حرفياً،ورغم علمي التام بتفوقها في مادة التعبير حتى إنها حصلت على
الدرجات النهائية فيها،إلا إنني فوجئت بقوة ودقة تعبيراتها عن موضوع تعذيب
وقتل الخنازير بمثل هذه الوحشية.
+إن قيام موقع الأقباط الاحرار بنشر
مقال لطفلة عمرها 13 سنة تعبر فيه عن رفضها للظلم، سوف يفتح الباب أمام
بقية اطفالنا ليعبروا عن وجهات نظرهم نحو الظلم الحادث لأهاليهم .

اشكرك حبيبي علي الموضوع

لكن اسمحلي حانقله لقسم النقاش العام ، لأن قسم الأطفال غير مناسب له

أشكرك علي تفهمك

شكرا استاذ مجدى على اهتمامك بمشاكل الناس الرب يعوضك

» طرق تعذيب النساء حسب الجنسية:
» أين توجد آلات تعذيب السيد المسيح !!
» رسالة إلى كل جزائري : أنا مصري انت مين ؟
» تهديد باختطاف بنات المسيحيين وقتل الخدام
» فرق الإغتيال المصرية وقتل هانى لوقا ونرمين خليل