رسالة من اهالى فرشوط

رسالة من اهالى فرشوط

شكر وتقدير من أهالى فرشوط

كتبها عادل جرجس الاثنين, 07 ديسمبر 2009 23:43

من ماما ام بيتر وبابا عازر وخالتوا رجاء وأبلتي تريز وإليا 4 ريشة وابراهيم الكوفتس وأونكل طونى ببلاد المهجر وكل عيلة العضمة الزرقا اللى تعبوا من الضرب والقهر ووجع الضهروالناس العبيطة اللى عملت وقفة إحتجاجية فى البرد والمعارف والاقربون... يتوجهون الي السادة المسئولين بخالص الشكر على تهجير أقباط فرشوط وحمايتهم من الضرب على قفاهم والتعرض للهجمات البربرية الزاخرة بالخوازيق سريعة الإنتشار ويخصون بالشكر السيد المحافظ ِِاللى كبر دماغة ومكلفش نفسة حتى يعدى عليهم ويميل ويرمى السلام .. والسيد مدير الأمن اللى مرابط فى البلد وجة بعد الهنا بسنة وياريت تقوم حريقة كل يوم فى البلد علشان نتمتع بطلعتة البهية وصحبتة الحلوة
وسلامنا لكل الأهل فى بر مصر المحروسة ونعرفكم بإن البت رفقة خطوبتها إتفكت علشان الشوار بتاعها كلة إتسرق قبل ما يحرقوا البيت أصلها بت فقرية وبوزها أبرم دة حتى التنجيد بتاعها خدوه والحمد لله قدر ولطف وقضا أخف من قضا ونعرفكم بإن دميانة مرات رزق أبو ارمانوس أبوها خدها عندة وقال للواد رزق جوزها إن عمرة ما هيشوف ضافرها تانى قال إية علشان جبان وساب حاله وماله وهرب م البلد .. طب هو كان بخوطره يعنى ولا بخوطره .. ماهو معملش كدة ألا من الشديد القوى ..والواد رزق قعد يترجى حماة نهار بحالة والتانى راسة وألف سيف ياخد بنتة وقال لرزق أن بيت أبوها مفتوح قام الواد رزق أتزرزر علية وقالة : هو أنت لاقى تاكل وتأكل كوم اللحم اللى فى رقبتك يابا أرمانوس علشان تاخد البت والتلت عيال هى يعنى المشرحة ناقصة قَتله وقام لامم هدوم مراتة والعيال فى بؤجه ومشاها مع أبوها ..

ونعرفكم إن المحلات والبيوت تمنها بقى فى الأرض علشان كل واحد عايز يبيع ويهج وأهو كل بلاد الله لخلق الله.. أما بالنسبة للواد جابر أبو جريس قال إية عايز يبيع فدانين الطين اللى حيلتة من حيطان الدنيا اللى أبوة وجدة طفحوا الدم فيهم ولموهم سهم سهم وقيراط قيراط ولما خاله وليم قاله إنت أتهبلت فى نافوخك ياوله إنت عايز تبيع الطين اللى وارثة أباً عن جداً والله لولا ما أنا عامل خاطر لعضم التربة كنت طخيتك بالنار .. قام الواد البجح اللى ما إترباش قالة : نار إية وكبريت إية يا خال أنت ها تعملى فيها محمد أبو سويلم فى فيلم الأرض دلوقت بس اللى نارك قادت أمال نارك كانت فين من سبوع .. قام خالة خدودة دلدلت ووشه أحمر ومشى وسابة .. أما بالنسبة لأحوال البلد فكله تمام التمام ولوز اللوز حتى كمان أسألوا أبونا القسيس اللى داير على المدعوقة اللى إسمها النت يقول إن الأمن زى الفل وشغال مع الكنيسة وبيقفشوا الحرامية والهجامين اللى عملوا العمايل المنيلة السبوع اللى فات .. وبصراحه عندة حق هو يعنى كان إية اللى حصل لما دكانين ولعوا ولا بتين إتدغدغوا قامت القيامه يعنى علشان تقوم البت العانس البايرة اللى إسمها حقوق الإنسان وتعمل الفضايح اللى عملتها دى كلها وبعدين أبونا بيقول ان احنا لازم ما نقابلش الشر بالشر يسلم فمك يا بونا والدليل على كدة ان إحنا ها نقابل البهوات المسئولين فى العيد وناخدهم بالأحضان ولية لاء ما هو برضة الناس مقامات يعنى علشان خاطر شوية وشوش كلحة تقوم الكنيسة تزعل كبارات البلد منها دة حتى عيب .. ياخى تندعق البلد واللى فيها ولا نزعلش حد من الأسياد ..

وأخيراً نهدى سلامنا الى الجميع وأغنية "جرح تانى"!!