قصـــة الخـــروف النـــاصح .... للكبار والصغار ... للشباب والبنات ...

قصة الخــروف النـــاصح

كان فى انسان عنده شوية خرفان ,

يجى كل يوم يحطلهم الاكل ويقعد شويه معاهم وبعد كدا يقفل الباب عليهم ويمشى .

وكان فى تعلب كان عارف ان المكان ده فيه خرفان وعايز يدخل جوا المكان اللى فيه الخرفان علشان يخطف خروف ياكله , بص لقى الباب مقفول فكر التعلب وشاف فأر
, فقاله احنا عايزين نبقى اصحاب وانا عايز منك مساعده وخدمه ,
الفأر قاله عايز منى ايه . فرد التعلب قاله انا عايز ادخل جوا الاوضه دى اخطف خروف ناكله انا وانت بس مش عارف علشان الباب مقفول
, فأنا عايزك تقرض فى الخشب بتاع الباب من تحت وتحفر فى الارض علشان اعرف ادخل من تحت عقب الباب

وفعلا فضل الفأر يعمل كدا لغاية ما فتح فتحه يدخل منها التعلب ومسك خروف
وقطعه وطلعه من تحت عقب الباب حته حته واكله هو والفأر .

وفضل على الحال دا هو والفار
وصاحب الخرفان مش حاسس بحاجة .. يجى كل يوم يبص يلاقى الباب مقفول ميخدش فى باله ان الخرفان ناقصه
لغاية ما جه فى يوم وكان فى خروف صغير قال

احنا ليه نستنى التعلب لما يدخل علينا وياكلنا واحد ورا التانى
انا اهرب واروح للتعلب واموته وهو نايم ونخلص منه .

وفعلا هرب الخروف الصغير وراح مكان التعلب ولقى التعلب نايم فقال هى دى فرصتى اموت التعلب
واخلص من شره . وفجأه حس التعلب وصحى من النوم ,

اتخض الخروف لكن التعلب لقيه خروف صغير كدا وشكله حلو
فقاله متخافش انا مش هأموتك انت عجبتنى وانا عايزك نكون اصحاب .

فرح الخروف بكلام التعلب وراح لباقى الخرفان قالهم انا خلصتكم من شر التعلب خلاص
وبقينا اصحاب وهو النهارده جاى يتعرف علينا ومش هياكلنا دا بقى حبيبى خالص.

فرحوا باقى الخرفان وفضلوا مستنين التعلب علشان يتعرفوا عليه ويبقوا اصحاب

كان التعلب راح لباقى التعالب اللى يعرفهم وقالهم تعالوا
انا النهارده عازمكم على وليمه كبيره وفعلا راح التعلب هو وباقى التعالب لمكان الخرفان ,

لقى الفأر قاعد مستنيه فقاله التعلب لاء انا مش محتاجلك تانى وراح موته
بعد كدا قعد التعلب يخبط على الباب فرد خروف : مين ....
فقاله التعلب : انا التعلب صاحبكم جاى علشان اتعرف عليكم انا وباقى التعالب علشان نعرفكم ومحدش مننا يخوفكم تانى
راح الخروف الصغير فرح وقالوهم انا مش قلتلكم بقينا اصحاب

, وفتح الباب للتعالب ودخلوا وفضلوا يفرحوا مع بعض وفى وسط ما هما فرحانين ومهيصين جه تعلب من التعالب وراح قفل الباب .. ومره واحده هجموا التعالب على الخرفان كلهم

هاجت الخرفان وخافت لكن ما خلاص فات الوقت . فضل الخروف الصغير مفزوع
لغاية ما مات كل الخرفان واكلوهم التعالب فقال الخروف للتعلب انت عملت ليه كدا
احنا مش بقينا اصحاب ؟ فرد التعلب وقاله : وهو ممكن يكون التعلب صديق وحبيب للخروف ؟؟؟
وهجم التعلب على الخروف الصغير ومات

صلواتكم ...

ربنا يحمينا من التعالب الموجودة فى كل مكان حوالينا
مرسى ليك كتير خادم الرب

» قصة العندليب والوردة الحمراء(للكبار والصغار)
» قصـــة حيــاة القديســة بوتامـيـنـا مسموعـــــــــــــــة
» لعبة التركيز العالي ..... للكبار فقط ...
» موضة جديدة للشباب بالصور ......... البطـــــــــــل
» ماذا يقول المسيح للشباب