هموم كتير باقية++++++

وقلنا للمدينة هموم كتير باقية
ولسة ياما وياما هتدور بينا الساقية
ماهو كاس يا صاحبى وداير
والكل لازم يشرب
ما دمت مسيحى خد دورك
واوعاك تشتكى اوعاك تهرب
اوعاك تقول الآه أو يسمع حد صوتك
لازم يسيل دمك وميفضلش غير سكوتك
ولفت الساقية ودارت وجه الدور عليك
يا نجع حمادى ودوقى زى اللى داقوا قبليك
وليه يا مدينة حزينة مش شايف فيك زهور..؟
وليه اغتالوا فيك اولادك وطعنوا فيك الطيور..؟
ليه الضلمة سادت ومبقاش جواك نور...؟!!
وليه مش سامع فيك غير آآه من قلب مكسور...؟؟!
فى ليلة عيد اتحولت الأفراح فيك لدموع
وبدل الأغانى نواح وصرخة من قلب موجوع
وساد السواد والظلم فيك يا نجع حمادى
ودم الشهدا لسة على الأرصفة بينادى
ليه حللتى يا بلدى دمى ونسيتى إنى مصرى..؟!
ليه نسيتى إنى ابنك وحفرتى بايديك قبرى...؟!
ولما جيت اشتكيلك ,لقيتك شايلة كفنى
باصرخ فين العدل فيك يا بلد ماعادش فيها أمان ؟
إزاى مات الضمير فيك وماعاد للحق لسان ؟
ليه ولعتى فى قلب أمى وفى كل القلوب نيران ..؟
وليه بدلتى عيدى وفرحى بالهم والأحزان ...؟؟!
على أرضك يا نجع حمادى سال الدم الغالى
والكل شايف ومغمض عينيه وبيقول وأنا مالى
ابكى يا قبطى ولا اصرخ حتى بصوتك العالى
مين يسمعك حتى وان شق صراخك عتم اليالى ..؟
برضه هيفضل عرضك ودمك ومالى حلالى.
شفت صفحات تاريخك لقيتها مكتوبة بالدم
صفحة الكشح وابوفانا , ديروط ولا فرشوط
ماهى كل صفحاتك عنوانها خراب ودمار وموت
وصفحة سمعت فيها صرخات من قلب أم
وجيت أوصف أحزانها وقف فى يدى القلم
ورجعنى التاريخ زمان لمذبحة فى بيت لحم
كل شىء تمام يا بلد رغم الدموع والهم
المسيحى اندبح خلاص وهو دا المهم..!
أكتب يا تاريخ وسجل حكاية وحلقة جديدة
من مسلسل عنوانه أحزان وهموم مدينة
يا مدينة عن الحق ساكتة ليه بتضحى بينا ..؟
يا ما صرخنالك كتير وانت رافضة تسمعينا..!
يا ما زمان شلنا همك وانت ليه بتظلمينا ..؟
وليه دايما بتفرقى ما بين أحمد ومينا...؟؟!
بس اوعى المرة دى كمان تضحكى برضه علينا
وتقولى ان الفاعل مجنون وتسيبى الدمع فى عنينا
يا بلد بيعانا تعبنا حرام كدة كفاية
اوعى يا بلدى تكذبى تانى وتألفى حكاية
اوعى تنسى دمى اللى سال ويضيع حق الضحايا
ايه ذنبى أنا أموت ويموت حلمى معايا .....؟؟!
وصلت المعايدة يا بلدى واستلم ولادنا الهدايا .
وبسأل وانا مجروح ياترى امتى تكون النهاية ...؟؟
وامتى ينزل الستار وتنطوى الصفحة الحزينة ..