جواب وداع............

جواب وداع ................ شفيق بطرس



كِدَه برضك..... يا سيدنا ....... طَب ليه ؟ طب ليه ياسيدنا عاد



قبل العيد .. ِكده ليه تسيِبنا ....... وتسافر مخصوص ده الميعاد

ماعُدتش وسطينا ياحبيبنا ....... وشوقنا إليك ..فى القلب زاد

......................

مكتوبالك يابويا و دى من نصيبك ..... تحضر البصخه فى حضرة القدوس

ها تفرح و تصلى العيد مع حبيبك ..... و سايبنا يتامى ومجاريح النفوس

هانستنى كل يوم أربع مواعيدك ...... محاضره روحيه ... من الفردوس

......................

آه يا سيدنا ... يا حبيبا يا غالى ... صعب علينا.. صعب قوى الفراق

بكت عليك الأديره ....والقلالى ... ودمع شعبك فى العنين رُقراق

وصلت للسما وفى المجدعالى ... لكن احنا بشر وكتير عليك بنشتاق

......................

لما كانت بتزيد أضطهادات كنيستك .... وتفيض قلوبنا أوجاع وحزن وأنين

لما تنخطف بالغدر والخديعة بنتك .... تقف وقفة أسد وقلبك ع المجروحين

نترمى فى حضن ربنا ..وفى حضنك ..... دلوقتى هانترمى يابويا فى حضن مين؟

......................

فى الأضطهاد علمتنا نقول يارب .... نجرى نشكيلك حكاياتنا ووجعنا

ولما النار جوه القلوب بتنصب ..... كلامك وإيمانك كان يطفى نيرانا

وتقولنا كله للخير ومسيرها تنحل .... وهايطلع بعد ظلمات الليل نهارنا

......................

ياما شلت هموم وهموم فى صدرك ..... واتحملت مهانه كتير وآلآم

يا ما وجع شعبك وجعك وعصرك ..... وفى قلبك تخبى أحزان وأسقام

كنت تطمنا بابتسامة أيمانك وحبك .... وتقول هايطلع فجر بعد الظلام

......................



بعد مدابح الكُشح قُلنا خلاص ..... قلنا راح حقنا والعدل مات

قلنا ماعاد من الظُلم لنا خلاص ...... وكل يوم تجد علينا حكايات

أيمانك بالرب يسوع كان المناص ...... وياما شِلت من قلوبنا آهات

......................

خلاص يا سيدنا يابابا شنوده ..... خلاص يا حبيبنا يا أحلى أنشوده

خلاص أتحرمنا من طلعتك ...... من حنان نظرتك وضحكتك المعهوده

مش هاننسى مهما عشنا كلمتك ... ربنا موجود ورعايته علينا ممدوده

......................

خلاص سبتنا .. ورحت السما .... وارتحت .. فى حضن الرب يسوع المسيح

استقبلوك شهداء أخميم وأنصنا ... والكُشح ونجع حمادى واسكندريه وأطفيح

مار جرجس مارقوريوس جُندنا .. . وشباب ماسبيرو معاك بيهتفـوا بالتسبيح

......................

صلى يابويا لكنيستك و المسيحيين .... يحميهم من الشرور إلهنا ... الرب يسوع

ببركة ستنا العدرا وكل القديسيين ..... تعمر كنايسنا وصليبها دايماً عليها مرفوع

تبارك كرازة عمل ولادك المؤمنين .... يعزينا الرب إلهنا ويمسح من عنينا الدموع

......................