مش أنا إللى عطست يا ريس.......

بواسطة



د. ماهر حبيب


هاتسى


يرحمكم الله يا أبو إسماعيل
مش أنا إللى عطست يا ريس
يرحمكم الله يا ولاد الشاطر
مش أنا إللى عطست ياريس
يرحمكم الله يا ولاد التحرير
مش أنا إللى عطست ياريس
ولا إنت؟ ...... ولا أنا ..... ولا إنت ؟ ...... ولا أنا .... ولا أنا .... ولا أنا
يعنى ماحدش عطس فيكم .... يبقى لازم فيه حد غريب
حد غريب !!!!!!!
إمسك إلحق حلق حوش ويلا بينا ندور على الغريب إللى دخل مغارة على بابا علشان يكوش على الكنز المدفون
وهكذا الحال كل فصيل من إللى ربنا رزقنا بيها يعمل المصيبة وبعدين يقول لك مش أنا إللى عطست قصدى عملتها يا مجلس يا عسكرى ونفضل ندور على لهو خفى كل واحد من دول يعملها مرة وتتفرق الدماء بين القبائل وماحدش بيسمع وما حدش بيفهم ولا بيتعاقب ما هو اللهو الخفى زكى جدا وكل مرة يطلع من حتة ومن تبع فريق مختلف يبقى ما حدش حا يتقفش لغاية ما الدنيا تخرب خالص
نيجى يوم موقعة الجمل كان مبارك خطب الخطبة العصماء إللى خلت بتوع التحرير يلموا عزالهم ويمشوا يقوم اللهو الخفى إللى كان لسه نازل الملعب وحا يخسر كل حاجة لو مبارك إستمر ما هو محظور بقى يقوم يلعب من ورا الكواليس وتحصل معركة الجمل علشان إللى مشى من الميدان يرجع ويلبسها الفلول و تبقى زى مسمار جحا لأى حد يضايق أصحاب طظ فى مصر
معركة محمد محمود مين إللى ولع الدنيا بالمظاهرات وإللى إتقتل فيها شباب ما لهوش ذنب غير إن تيار التحرير حا يطلع من مولد الإنتخابات بلا حمص وسودانى ولا حا يطول بلح البرلمان ولا عنب الشورى يقوم يعملوا أيه يولعوا فى البلد وتتعرى البنات فتولع أكتر ويمكن الدنيا تخرب فيلغوا الإنتخابات وطبعا يطلع إن السبب فى محمد محمود لهو خفى غير اللهو الخفى بتاع الجمل وأهو كله لهو مخفى ومحدش بيفتح المندل اليومين دول علشان نعرف الفاعل!!!
ونيجى لمعركة العباسية إللى ولاد أبو إسماعيل طلعوا علشان يجروا شكل العسكرى ويولعوا الدنيا علشان سمعة يخش الإنتخابات بالرغم من عدم إنطباق الشروط إللى قعدوا يألفوها مع البشرى و صبحى صالح علشان يقلشوا الناس المحترمة ومحدش كان فاكر إن ملعوب الباسبور الأزرق حا ينكشف وطبعا علشان نولع الدنيا وأولاد أبو إسماعيل يكون ليهم نصيب فى اللهو الخفى تحصل مجزرة العباسية ويطلعوا ويقول لك مش إحنا السبب وبرضه يطلع اللهو الخفى إللى بيطلع بالليل والدنيا ضلمة والديابة بتعوى وبرضوا محدش شايف ولا عارف ننوس عين اللهو الخفى.
طبعا زى زمان أيام ما كان كل حاجة يطلع ليها صباع خارجى يلعب فى الموضوع و برضه بعد ما مشيوا بتوع الصوابع الخارجية رجعوا لنا الصوابع تانى بس على أيدين إللى قلبوا لنا الدنيا وما عرفوش يعدلوها وكل واحد فينا وفيهم عامل عبيط وماشى ورا الزعيم يلزقها لأقرب صباع ويقول لك لازم فيه هنا حد غريب ما دام كل واحد بيقول مش أنا إللى عطست يا مجلس أو يا ريس مش فارقه ما دام كلمة السر مدفونة فى الميدان ومغارة على بابا مغلقة للتحسينات