لازم يكون لكل واحد صليب

لازم يكون لكل واحد صليب

قالت : بتعملوا اية ؟ خلاص... وساعة انتقالها كانت الابتسامة الحلوة على وشها اللى كان بيشع نور زى واحد كان فى حبس فى سجن وبينطلق
فى الحقيقة انا اتاثرت جدا وبكيت كتيروكنت مش قادرة امسك دموعى فبعد قداس يوم الثالث الترحيم جيت بالليل وقلت لنفسى : هو انا ح اقعد هنا زعلانة وهى فوق مع ربنا فرحانة انا ح اقف اصلى علشان اتعزى
وقفت اصلى فلقيت القلاية نورت وامنا تواكليا قدامى لابسة ابيض وماسكة فى ايدها صليب منور خالص وفرع زيتون اخضر ولابسة صليب الماظ وكان وجهها مضىء جدا وكانها فى سن العشرين .. كانت فرحانة جدا فاول ما شفتها قلت : باسم الصليب ... باسم الصليب .. باسم الاب والابن والروح القدس الالة الواحد امين .
رشمت الصليب وقلت لها : يا امنا تواكليا مش انت مت ...؟
قالت لى : لأ انا ما موتش
قلت لها : اخطيت انتقلت او اتنيحتى
قالت : ايوة اتنيحت يعنى استريحت
فقلت لها : اكتر حاجة نفعتك اية ؟
فقالت : عمل الرحمة والمحبة والاحتمال انا كنت بافرح بالاساءة لما حد يسئ الى كنت كانى حصلت على هدية ومن زمان نفسى فيها
قلت لها : طيب وانت جيتى ازاى ؟
قالت لى : انا جيت علشان دموعك دى يبقى انا فرحانة ومبسوطة خالص وانت بتعيطى ؟ برضة دة كلام ..؟ انا فرحانة جدا زى ما بيقول معلمنا بولس الرسول :
" ما لم تر عين ولم تسمع اذن ولم يخطر على بال انسان ما اعدة اللة للذين يحبونة " (1كو9:2)
فانا دلوقتى لا ألم ولا مرض كل دة انتهى وانا فى سعادة لا توصف يعنى ما اقدرش اعبر عن مقدار الفرح اللى انا فية ..
فى الوقت دة انا كنت بفكر اترك مسئولية الدير والموضوع دة كان تاعبنى فقالت لى :
بصى الموضوع دة من ربنا ومافيش داعى تفكرى فى الكلام دة واهم حاجة ما تسبيش قانونك الرهبانى يعنى انت تصلى كل صلواتك وما تخليش المسئولية تنسيك المزامير
قلت لها : طيب انت لية ماسكة فرع زيتون اخضر ؟ هو مش دة للى استشهدوا ؟
قالت : لا مش شرط
اولا : دى علامة النصرة عموما وبعدين ربنا اعتبر لى الالام والمرض اللى احتملتة بفرح وشكر استشهاد .. وربنا هو اللى قوانى طبعا .. وكمان انا كنت بانكر ذاتى واعمل عبيطة وكانت الاهانات مش بس باحتملها لكن بافرح بها ودة ربنا حسبة لى استشهاد
فقلت لها : يا بختك فقالت لى : انا مش عايزاك تبكى ومن ساعتها بقيت فرحانة وبطلت ابكى ..
وفى مرة تانية جات وقالت لى على رسالة اوصلها لاحدى الراهبات وكنت كل ما اتعب من اى مشكلة فى المسئولية تيجى وتعزينى ..
ومرة تالتة لقيت امنا تواكليا جاية بنفس المنظر وطالعة على الدور الثالث وانا كنت فى الدور التانى فقالت لى
انا المرة دى رايحة لامنا منجدة علشان اقول لها تستعد لاننا ح نيجى ناخدها بزفة
قلت لها : وقعتك بيضا ح تاخدى كل الحلوين .. امتى دة ؟
قالت : بتوقيت العالم بعد شهرين
تانى يوم الصبح لقيت امنا منجدة بتخبط على , افتحى يا غالية افتحى يا حبيبة .. كانت دى لغتها ..فتحت لها فقالت لى:
انا شفت امنا تواكليا وكان وشها منور ولابسة صليب الماظ وماسكة صليب وفرع زيتون اخضر وقالت لى : استعدى علشان ح نيجى ناخدك .. وفعلا بعد شهر بدات امنا منجدة تتعب وسافرت
فالجهاد مش بالوقت لكن بالقلب لان ربنا عايز القلب فالواحد يعمل بقدر ما يمكنة ويطلب شفاعة الست العدرا وصلوات القديسين وهم يساعدوة وربنا يعمل فى الشخص لان القلب الحلو يسكن فية ربنا
وعمل الرحمة لازم يبقى بفرح بيقول الكتاب : الراحم فبسرور
+ وفى الخفاء ... لاتعرف شمالك ما تفعل يمينك ( متى 3:6 )
+ وبدافع المحبة ومن اجل اللة وحدة يعنى ما اعملش الرحمة بافتخار او بمعنى ان الناس تعرف لأ .. لازم فى الخفاء وربنا هو اللى يكافىْ ويعطى والواحد ياخد اجرة من ربنا لكن لو كانت مش فى الخفاء يبقى ح اخد مديحى من الناس.
+عمل الرحمة مش بضخامتة , لكن المحبة اللى معمول بها زى فلسى الارملة فهى اعطت كل ما عندها وعلشان كدة ربنا مدحها يعنى كل واحد يعطى بقدر استطاعتة
+ الواحد يعمل عمل الرحمة للجميع مش بس مع اللى باحبة او اللى بارتاح لة لأ مع الكل دون تفريق او تمييز وما انتظرش مقابل او مديح لانى باعملة من اجل اللة وحدة
+ عمل الرحمة مش بالمال فقط لكن احتمال الغير دا عمل رحمة .. اجذب واحد بعيد عن ربنا للكنيسة بمحبة او بكلمة حلوة واخلية يعترف ويتناول دا عمل رحمة .. عمل الصلح والسلام بين النفوس دا عمل رحمة وربنا بيقول : اريد رحمة لا ذبيحة ( مت 7: 12 )
القصة دى من كتاب رائع اسمة ( تماف ايرينى وحياة رهبانية متقدة بالحب ساهرة تحت اقدام المسيح )

اشكركم اخواتى واحبائى على ردودكم الجميله
اللى بتدفعنى وتشجعنى
نشكر ربنــــــــــــــــا
الرب يبارك حياتكم ويعوضكم