مرسى رئيسا بوضع اليد .....

على طريقة البدو فى الإستيلاء على الأراضى بوضع اليد مرسى وإخوانه بيخطفوا الرئاسة وبيبلطجوا على العالم وعارفين إن أنصار الدولة المدنية مش بتوع بلطجة وفتونة وأخد الحاجة بالغصب والدراع وعلى طريقة الإنقلابات بتاعت الدول العربية إللى يصحى الأول يمسك الحكم خرج علينا العياط وعيط لمحمد علشان يصحى جماعته من النوم علشان هو قرر يستولى على الحكم الساعة 4 صباحا وطبعا الناس من الخضة وأنا واحد منهم سلم بالأمر وكأن الأمر حقيقة ولكن الموضوع كان شبورة علشان يخبوا خيبتهم التقيلة من بطاقات تصويت مزورة وصناديق مليانه بأصوات أموات خرجت من القبور علشان تصوت للعياط وطبعا بطريقتهم المعروفة الغجرية ست جيرانها وخدوهم بالسوط لا يغلبوكم عملوا التمثيلية دى وخرجوا فى ميدان التحرير علشان يولعوا فى مصر.

لكن العملية دى كشفت الحاج أبو عمامة إللى معمم الأمريكان ومشربهم مية أصفرة لما بيصر على إن مجلس البلكيمى وعلى ونيس هو أحلى من الشرف مفيش وإن برطمان الإخوان المخلل هو أحلى ديموقراطية فى العالم وإن لجنة الدستور الحمضانة هى أحلى جمبرى وكفيار وإستاكوزا ولو بصينا بمنظار أوسع حا نلاقى إن أبو عمامة المسلم حتى النخاع حا يخرج من الرئاسة وقد أقام الخلافة الإسلامية وحا يحقق إللى ما قدرش عليه أسامة بن لادن وبعدين مافيش فرق كبير بينهم فواحد أسامة والتانى أوبامة فتونس وقعت فى شر أعمالها وبقت إمارة إسلامية وليبيا بقت إمارة إسلامية ومصر بقت إمارة إخوانية وجنبهم حماس إسلامية وسوريا حا يفضل وراها أوباما ينعق فيها كالبوم لغاية ما تبقى إمارة إسلامية ومعانا السودان فى أيد البشير بلدا إسلامية ما فيهاش قلاقل ومستقرة لأنها مش داخله فى الخطة يبقى فاضل أيه ما تصحوا من الغيبوبة بقى يا شباب الفيس بوك والتويتر .

طبعا الغرض إللى الحاج أبو عمامة بيخطط له هو إن الدول دى لما تبقى تحت إيد الخليفة محمد بديع حا يبوسوا إيد أبو عمامة ويسلموا لهم دقنهم لما يحبوا يضربوا إيران وطبعا هما مش عارفين إنهم بعد ما يركبوا على قلبنا حا يزحلقوا أوباما فى أقرب قشرة موز ويدوا له نفس الخاذوق إللى شربته أمريكا من بن لادن فى أفغانستان أو من الشيعة فى العراق وبأفكر أبو عمامة إللى خدته القرعة تاخده أم الشعور فى كل حته أمريكا عملت ناصحة فيها وخدت نفس المهموز.

أبو عمامة عارف إن لو شفيق نجح حا يوقف لهم المخطط الجهنمى وإن العسكرى صحيح كان مقسمها مع الإخوان على أساس إنهم يلعبوا سوا لكن العسكرى فهم الفولة وإنه مجرد كوبرى للشاطر وإخوانه وحس بالغدر فواقف لهم زى اللقمة فى الزور وكل الأمل إنه يفضل معطل الموضوع لأن مصر حا تبقى مجرد شخشيخة فى إيد الإخوان وحا نرجع ميتين سنة ورا.

مين يا ترى إللى حا يكسب العسكر والا الإخوان وسلمولى على الحاجة ديموقراطية وبنت خالتها حرية وبس صعبان عليا شباب التحرير إللى عامل مفتح وهو يا عينى عمال ينضحك عليه للصبح وعامل زى فؤاد المهندس لما كان بيمثل دور طبوزاده وصادق أفندى بيديله كل يوم طعميياية واحدة وبعد ما دوره يخلص ويمشى وهو قفاه يأمر عيش وهو عمال يقول رايح أجيب الديب من ديله وأقلق نومه فى نص الليل وإن ما عرفتش أجيبه أسيبه وأرجع أقول ما لقتلوش ديل فيا جماعة التحرير وفروا تعبكم لا فيه ديب ولا غيره لكن فيه وحش مفترس أكلكم لحم ورماكم عضم وفى الأخر ضحك عليكم وبقى رئيسكم بوضع اليد.