عزرائيل مصر ....................

الظاهر إن عزرائيل دلوقتى أخد عضوية فى حزب الحرية والعدالة وبقى كل همه إنه يخلص على كل خصوم الإخوان وتبان الأمور كأنها قضاء وقدر وقد بدأ عزرائيل أبو لحية فى تصفية أهم الرموز وأخد الجنرال على خوانة فا مأخدش فى إيده غلوه ولقينا الجبل ينهار فى أيام قليلة ويتحلل جسمه فى تطور مرضى غريب لا نجد له تفسير علمى إلا عند عزرائيل إللى سمم عرفات لأن عزرائيل عرفات وعزرائيل الجنرال سليمان من فصيلة واحدة بتشتغل بأعلى تكنولوجيا للموت فى العالم.

وطبعا لأن الجنرال التانى طلع أنصح من الكل وحصن نفسه لغاية دلوقتى فا عزرائيل أبو دقن مش عارف يوصل له فقرر إحالة أوراقه إلى عزرائيل صغنن كل مهمته إنه يصحى الصبح يخش الحمام وثم أخذ يفكر ويفكر ثم عاد يفكر ويفكر حا يقدم بلاغ شكله أيه للجنرال شفيق لأنه مصمم إنه يغلب شهرزاد ويعمل لشفيق مسلسل ألف قضية وقضية من إخراج طاهر ابو فاشة وبيحاول إنه ينزل بيها فى رمضان إللى جاى لأن رمضان 2013 حا ينزل له قرار رئاسى بإنه ممنوع ظهور الممثلين والممثلات فى المسلسلات الرمضانية وعلى الفنانين تجاوز العقبة دى بعمل المسلسلات من غيرهم.

وطبعا عزرائيل بيحاول مع البرادعى وخصوصا بعد عملية الركبة إللى إتعملت وبعدها ما شفناش ولا سمعناش صوت البرادعى وكأن الأحبال الصوتية للبرادعى موجودة فى ركبته مش فى حنجرته ونتمنى له السلامة وعودته على التويتر لتشجيع الالتراس وهما قاعدين ناصبين خيام فى إستاد مختار التتش.

ولأن السيد عمرو موسى عمل حركة نص كم وهى محاولة لم شمل النخبة المنقسمة على ذاتها والأتحاد ده فى حد ذاته خطر شديد على الفكر المصرى الجديد إللى هو إنك ترضى بما قسم لك وإمبارح كان مبارك والنهارده مرسى فبلاش إفترى أحسن تنزل عليكم لعنات عزرائيل وتحصلوا الجنرال سليمان بس من غير جنازة عسكرية ولأن عمرو موسى لعيب سياسة قديم وحب إنه يقلب الترابيزة على الحكام الجدد فقرر عزرائيل إنه يبعت له صبى عزرائيل سايق تريلا علشان يسحق العربية من ورا حيث يجلس عمرو ولكن لظروف خارجة عن إرادة عزرائيل التريلا وقفت فى الشنطة ومحصلتش كرسى عمرو موسى وطبعا عزرائيل الصغير حا ياخد على دماغه إنه مقصر فى شغله.

الظاهر إننا حا نشوف عزرائيل شغال الله ينور على أعداء وخصوم الإخوان مش علشان حاجة بس لأنه مكشوف عنهم الحجاب وبركاتهم وبركات نهضتهم هلت علينا علشان البلد بتاعتنا تبقى إيد إخوانجية واحدة والأيد التانية نقطعها ونرميها فى البحر علشان ثبت بالدليل القاطع إن الأيد التانية ملهاش لزوم بدليل إنه مطلوب من المؤمن إنه ياكل بأيد واحدة فلو الأيد التانية كان ليها لازمة كان أكل باليمين وبالشمال ويا ترى يا هلترى عزرائيل منشن على مين بعد كده ونصيحة لكل معارض إكتب وصيتك من دلوقتى لأنك مش عارف حا تموت بالسم والا بالدهس والا بنزيف فى الركبة إللى هى أخطر من نزيف المخ