حبيب الكل يابابا واحشنا كتير ......

حبيب الكل يابابا واحشنا كتير
واحشنا ف قاعدة يوم الأربع بجمع غفير
واحشنا فين اجابتك مع التفسير
د أنا لما أحن وأشتاقلك هاروح الدير

واحشني صوتك الحاني ياقلب كبير
ياضحكة ترن في وداني بدون تأخير
رسمت معاني للكلمة ف شعر قدير
وف كرازة كتبت لنا ورئيس تحرير

عشت ف طاعة ليسوعنا بدون تقصير
ف عز الأزمة لو تصمت لك التأثير
سبيت الكل بمحبة بلا تعيير
يزيد حبك وإن زادوا لك التحقير

جاهدت ونلت إكليلك مع التبرير
صبرت وحار ف ايمانك عدو الخير
وما كليت ف يوم أبداً عن التبشير
كنت الراعي والبابا ودلوقتي شفيع وسفير

ياحامي كرازة و الكلمة من التغيير
أسد بشجاعة ف دفاعك بدون تفكير
بابانا إنت ومعلم مالكش نظير
وجيد كنت وسطينا بحب وفير

نائب كنت لملكنا علي الكرسي كألف وزير
ياقائد إنت بالفطنة حكيم ومشير
حفظت الكلمة خبيتها ف سن صغير
ف قلبك بيها تتغني مع المزامير

عطاء بمحبة فياضة لكل فقير
وف الأمراض رفضت أنك تكون ف سرير
وكنت ف عز الآمك تداوي كسير
وكانت ايدك الحانية بتدي كتير

ثلاث أقوال نرددهم حلاوتهم كأشهي عصير
كنت يوماتي بتقولهم مع دموعك في وقت عسير
ربنا موجود يا أولادي ف كل مصير
سيبوا له كل مراكبكم مع الدفة وهي تسير

حفرت ف عمق أسماعنا د كله للخير
ومن كلماتك العذبة نقول للغير
كلامك لابس الحكمة وأنت خبير
مسيرها تنتهي بإيده وهو بصير

شنوده إسم ف قلوبنا وف العالم مع المشاهير
أخدت كرامة من ربك وم الإنسان وكل ضمير
بسيرة عطرة ومباركة نقول اسمك حروفه تنير
ف كل قارة وولاية كنيستنا تزيد تعمير

الشين - شعاعنا هاينور ولو حتي في ضلمة بير
ونون - نرجع له إن تهنا وإن غابت فينا المعايير
والواو - وسعت كنايسنا وتعدادهم بدون تبذير
وده - ف كل خطواته ها نتبعها وعليها نسير