مرسى دبح القطة ..........................

مرسى دبح لكم القطة دبح الدستور دبح المرحومة ديموقراطية دبح القضاء دبح النايب العام وفتواته ضربوا الحريرى والفخرانى وكل واحد حا يعمل فيها سبع البرمبة شومة وعصاية وياخد إللى فيه القسمة وبعدها يضرب دماغه فى أقرب حيط علشان ما حدش حا يسمع ولا يشوف ما خلاص القطة إندبحت وماتت من يوم ما زحلق المشير وعنان بطريقة أسهل من زحلقة واحد فى قشرة موز.

طبعا كل المظاهرات إللى طالعه و قوى المجتمع المدنى المهلهلة حا تفضل تبكبك فى ميدان التحرير يومين تلاتة وحتى اسبوعين ثلاتة وحا يخش عليهم البرد ومفيش بطاطين قطرى ولا ساندوتشات كنتاكى ولا حتى من التابعى الدمياطى فا حيخلص البنزين وكل واحد يروح يتدفى تحت البطانية فى بيته ويقعد يحلم فى المنام إنه قاعد عامل أسد جسور فى التحرير والفضائيات عماله تعمل معاه لقاءات وعمالين يتزاحموا عليه لدرجة إنهم ما خدوش بالهم وزقوه لغاية نهر النيل من كتر إندفاعهم ولما حس إنه مبلول صحى من النوم وقال الله ما إجعله خير وقام مغير هدومه من سكات بدل الفضايح قدام المدام.

بصراحة مرسى أو بتعبير أدق الإخوان حاسبينها صح سيبك من الإصلاح سيبك من حل مشاكل البلد سيبك من المزلقنات المفتوحة هما عاوزين حاجتين الأولانيةغزة وطبعا إنتو عارفين أو مش عارفين اللعبة الكبيرة إللى عملتها حماس لما جرت شكل إسرائيل وإبتدت إسرائيل تضربهم وموتت لهم كام واحد وراح مرسى عمل بطل المنطقة وقال لأمريكا أنا حا أحل لكم المشكلة دى بطل ياد إنت وهو رمى الصواريخ الصوتية وعندى دى يا حبيبى يا أوباما وما تزعلش يا صديقى بيريز عاوز أيه ؟حماس ومش حا تهوب نحيتك طول ما أنا وإنت متفهمين وأنا ضامنهم وعاوز أيه يا صديقى نتانياهو شوية مجسات يلا حطهم هى كانت بتاعت أبونا دا إحنا مستليفينها من حماس مؤقتا لغاية ما نشوف صرفة ونعمل لهم فيها دولة صغنونة ومحندقة وعش العصفورة يقضينا وراضيا عنى يا تانت كلينتون دى مجيتك عندى غالية على قوى وسيب وأنا أسيب حا تعدولى موضوع الدستور حا أعديى لكم موضوع حماس ده وقد كان مشيت هيلارى وتانى يوم أوباما بيصرح إنه معجب بالرجل المعجزة مرسى وبراجماتيته وسلم لى على البراجماتية.

والتانية مصر وطبعا دى شعبها غلابة يخاف ما يختشيش يطلع الإخوان بمظاهرة تنقلها كل الفضائيات ويطلع مرسى متشنج كالعادة ويبخ فيكم بختين تكشوا وتطلعوا بمظاهرات تملا عين الشمس تروح الفضائيات مصورة الركن البعيد الهادى وتفتكروا إن المولد إنفض فترجعوا لعيشتكم إللى إتعودتوا عليها وإنتوا بتسبوا للعيش والعيشة وإللى عايشنها وتلعنوا أبو خاش العيش والحرية والعدالة الإجتماعية وتقولوا ما أنا كنت متنيل على عين أهلى وقاعد كان لازمتها إيه المشورة مظاهرة رايحة ومظاهرة جاية وثورة رايحة ومش راجعة وديكتاتور رايح وديكتاتور راجع بإخوانه وإخوانكم البعدا عمالين يوزعوا أنفسهم على كل المواقع فشر الحزن الوطنى إللى طلع هاوى بالنسبة لحزب الديكتاتورية والندالة وبكده مرسى حط أيده على مصر بره وجوه وكل الفلفصة التحريرية مجرد وقت لغاية ما تنسوا و ربنا يدينا ويديكم طولة العمر 30 سنة إخوان كمان مادام مرسى دبح القطة والقطة طلعت روحها من غير خربشة ولا حتى لحقت تقول ناو ناو